மொழிபெயர்ப்பின் மூலக் கட்டுரையை இங்கே காணலாம். 

கடந்த செவ்வாய் மற்றும் புதன்கிழமைகளில் ஹவாயின் மவுய் தீவில் ஏற்பட்ட பயங்கர காட்டுத்தீயில் இறந்தவர்களின் எண்ணிக்கை ஞாயிற்றுக்கிழமை 93 ஆக உயர்ந்துள்ளது. 100 ஆண்டுகளுக்கும் மேலாக அமெரிக்காவில் ஏற்பட்ட மிக மோசமான தீ விபத்து இதுவாகும்.

சனிக்கிழமையன்று, இறந்தவர்களைத் தேடும் மற்றும் அடையாளம் காணும் பணி இன்னும் ஆரம்ப கட்டத்தில் இருப்பதாகவும், மேலும் பல பாதிக்கப்பட்டவர்கள் கண்டுபிடிக்கப்படுவார்கள் என்று எதிர்பார்க்கப்படுவதாகவும், குறிப்பாக லஹைனா நகரைச் சுற்றியுள்ள ஐந்து சதுர மைல் மண்டலத்தில் அதிகாரிகள் தெரிவித்தனர்.

மவுய் போலீஸ் அதிபர் ஜான் பெல்லெட்டியர் கூறுகையில், அந்த பகுதியில் வெறும் 3 சதவீதத்தை மட்டுமே இறந்தவர்களை தேடிக்கண்டுபிடிக்கும் நாய்கள் ஈடுபட்டுள்ளன என்றும், இறப்பு எண்ணிக்கை மேலும் அதிகரிக்கும் என்றும் 'எங்களில் யாருக்கும் அதன் அளவு இன்னும் தெரியவில்லை' என்றும் கூறினார். இறந்தவர்களை அடையாளம் காண்பது மிகவும் கடினம், ஏனெனில் 'எச்சங்களை நாங்கள் எடுக்கிறோம், அவை உடைந்து விழுகின்றன' என்று பெல்லெட்டியர் கூறினார். இதுவரை, தீ விபத்தில் இறந்தவர்களில் இருவர் மட்டுமே அடையாளம் காணப்பட்டுள்ளனர், மேலும் அவர்களது அன்புக்குரியவர்களை அடையாளம் காண டிஎன்ஏ சோதனை தேவைப்படும் என்று பெல்லெட்டியர் குடும்ப உறுப்பினர்களிடம் கூறினார்.

ஞாயிற்றுக்கிழமை காலை CBS 'Face the Nation' இல் ஒரு நேர்காணலில், FEMA நிர்வாகி டீன் கிறிஸ்வெல், 'தேடலுக்கு நெருக்கமான பல ஆதாரங்களில்' இருந்து இறப்பு எண்ணிக்கை நூற்றுக்கணக்கில் எட்டக்கூடும் என்று கூறியபோது, அவர் இது தொடர்பாக பெற்ற அறிக்கைகளின் துல்லியம் குறித்து நிருபர் ஜொனாதன் விக்லியோட்டி கேட்டார். அதற்கு கிறிஸ்வெல் 'அவர்கள் உங்களுக்கு அப்படிச் சொல்கிறார்கள் என்றால், நான் அவர்கள் கூறியதை மறுபடி ஊகிக்க மாட்டேன். அவர்கள் எதைப் பார்க்கிறார்கள் மற்றும் எத்தனை பேர் கணக்கிடப்படவில்லை என்பதை அவர்கள் தான் நன்கு அறிவார்கள்' பதிலளித்தார்,

ஹவாய் கவர்னர் ஜோஷ் கிரீன் சனிக்கிழமையன்று, 2,200 கட்டிடங்கள் சேதமடைந்துள்ளன அல்லது அழிந்துவிட்டன என்றும் அவற்றில் 86 சதவீதம் குடியிருப்பு கட்டமைப்புகள் உள்ளன என்றும் கூறினார். தீ விபத்துக்கான காரணம் இன்னும் கண்டறியப்படவில்லை, இருப்பினும் டோரா சூறாவளி காற்று மின் கம்பிகளை இடித்துத் தள்ளியது, பின்னர் காய்ந்த புல்லை தீப்பற்ற செய்தது என்று சில தகவல்கள் கூறுகின்றன.

தீவில் மேலும் மூன்று தீ விபத்துகள் பதிவாகியுள்ளன. இரண்டு இன்னும் எரிந்து கொண்டிருக்கின்றன, ஒன்று தெற்கு மவுயின் கிஹெய் பகுதியில் மற்றொன்று மலை மற்றும் உள்நாட்டில் உள்ள மலைப்பகுதி என்று அழைக்கப்படும், அங்கு 500 க்கும் மேற்பட்ட வீடுகள் தீயினால் பாதிக்கப்பட்டன. லஹைனாவுக்கு வடக்கே உள்ள கடலோர சமூகமான கானாபாலியில் வெள்ளிக்கிழமை மாலை மற்றொரு தீப்பற்றியது. ஆனால் அது அணைக்கப்பட்டதாக அதிகாரிகள் கூறுகின்றனர்.

லஹைனாவில் உள்ள முக்கிய தெருவில் கட்டிடங்கள் தரைமட்டமாக்கப்பட்டு எரிக்கப்பட்ட வாகனங்களின் காட்சிகள், சமூக ஊடகங்களில் வெளியிடப்பட்டது, அவை போரின் அழிவு சக்தியை நினைவுபடுத்துகிறது. பெப்ரவரி 1945 இல் ஜேர்மன் நகரங்களில் நேச நாடுகளின் தீக்குண்டுத் தாக்குதலுடன் ஏற்பட்ட அழிவை ஒப்பிட்டு, ஹவாய் அவசரநிலை நிர்வாக முகமையின் செய்தித் தொடர்பாளர் ஆடம் வெய்ன்ட்ராப் செய்தி ஊடகத்திடம் கூறினார்: .'

2018 ஆம் ஆண்டில் கலிபோர்னியாவின் பாரடைஸில் வீடுகளை எரித்து 85 பேரைக் கொன்ற அமெரிக்காவின் அடுத்த மிகக் கொடிய காட்டுத்தீயான கேம்ப் ஃபயரைப் போலவே, மவுய் தீ குறைந்தது 1200˚ பாரனஹைட் வெப்பத்தை எட்டியது மற்றும் அலுமினிய இயந்திரத் தொகுதிகள் மற்றும் கார் சக்கரங்களை உருக்கி திரவக் குளங்களாக மாற்றியது.

காட்டுத்தீயின் முழு அளவிலான தாக்கம் இன்னும் சில நாட்கள் அல்லது வாரங்களுக்கு தெரியாது என்றாலும், மவுயில் இயற்கை பேரழிவின் இறப்பு மற்றும் அழிவு என்பது முதலாளித்துவ ஆளும் வர்க்கம் மற்றும் அதன் அரசாங்கம் மற்றும் ஆளும் அரசியல் கட்சிகளின் மீதான குற்றச்சாட்டுகளாகும்.

காலநிலை விஞ்ஞானிகளும் சுற்றுச்சூழல் ஆர்வலர்களும் இரண்டு தசாப்தங்களாக இத்தகைய அழிவுகரமான விளைவுகளைக் கொண்ட ஒரு தீ பற்றி எச்சரித்துள்ளனர், ஆனால் அவை முதலாளித்துவ நலன்களுக்கு குறுக்கே வருவதால் முக்கியமான தடுப்பு நடவடிக்கைகள் எதுவும் எடுக்கப்படவில்லை.

ஹவாய் காட்டுத்தீ மேலாண்மை அமைப்பின் இணை நிர்வாக இயக்குநரும், 2014 இல் உருவாக்கப்பட்ட மவுய் காட்டுத்தீ திட்டத்தின் இணை ஆசிரியருமான எலிசபெத் பிக்கெட், வோல் ஸ்ட்ரீட் ஜேர்னலிடம், கூறுகையில் 'நிதிப் பற்றாக்குறை, கரடுமுரடான நிலப்பரப்பில் தளவாடங்களை கொண்டு செல்லும் தடைகள் மற்றும் முன்னுரிமைகளுக்கான போட்டிகள் ஆகியவற்றால் அவசரகால-பதில் திறனை அதிகரிப்பது தடைபட்டுள்ளது ' என்று கூறினார்.

இந்த மற்ற முன்னுரிமைகள் என்ன? அமெரிக்க அரசாங்கம், பெருநிறுவன ஊடகங்களின் ஆதரவுடன், உள்கட்டமைப்பைக் கட்டியெழுப்புவதற்கும், அத்தகைய பேரழிவுகள் நிகழ்வதைத் தடுக்கும் நடவடிக்கைகளைத் தயாரிப்பதற்கும் பணம் இல்லை என்று தொடர்ந்து கூறிக்கொண்டிருக்கும் அதேவேளையில், போர் மற்றும் வங்கிகளையும், பெருநிறுவனங்களையும் நிதிப் பிணை எடுப்பதற்கு முடிவில்லாத நிதிகளை வழங்கிக்கொண்டு வருகிறது.

அமெரிக்க அரசாங்கம், கடந்த மூன்று தசாப்தங்களாக ஜனநாயக மற்றும் குடியரசுக் கட்சி நிர்வாகங்கள் மூலம், ஏகாதிபத்தியப் போர்களுக்காக டிரில்லியன் கணக்கான டாலர்களை செலவழித்துள்ளது. மேலும் வால் ஸ்ட்ரீட்டில் கோடீஸ்வரர்கள் பணம் பண்ணுவதற்கு இடையூறு இல்லாமல் அதே அளவு நிதி அமைப்புக்குள் டாலர்கள் கொட்டப்படுகின்றன.

மவுய் காட்டுத்தீயுடன், காலநிலை மாற்றத்தை (வளிமண்டலத்தில் கார்பன் அதிகரிப்பு, பல தசாப்தங்களாக பொறுப்பற்ற, இலாப உந்துதலால் எற்பட்ட விளைவு) எதிர்கொள்ள முதலாளித்துவ வர்க்கத்தின் மறுப்பு, சமூகத்தின் இருப்பை பேரழிவிற்கு தள்ளுகிறது என்பதில் சந்தேகமில்லை.

ஆயினும்கூட, அரசியல் ஸ்தாபனத்தின் பிரதிபலிப்பானது ஒரு வியக்கத்தக்க அளவு அக்கறையின்மை மற்றும் பேரழிவுக்கான எந்தப் பொறுப்பையும் தட்டிக்கழிப்பது ஆகிய இரண்டையும் கொண்டுள்ளது. வியாழன் அன்று வெள்ளை மாளிகையின் மூன்று பத்தி அறிக்கையைத் தவிர, ஜனாதிபதி பைடென் ஹவாயில் ஏற்பட்ட உயிர்ச்சேதம் பற்றி எதுவும் கூறவில்லை.

ஞாயிற்றுக்கிழமை காலை CNN இன் State of the Union நிகழ்ச்சியில் ஜேக் டேப்பரிடம் பேசிய ஹவாயின் ஜனநாயகக் கட்சி செனட்டர் Mazie Hirono, தான் 'இந்த சோகத்திற்கு சாக்கு சொல்லப் போவதில்லை' என்று கூறினார். எவ்வாறாயினும், அதிகாரிகள் ஏன் தீயிற்கு தயாராக இருக்கவில்லை என்று தாப்பரிடம் கேட்டபோது, ​​அவர் ஆச்சரியமான கருத்தை வெளியிட்டு, ' எங்களுக்குத் தேவையான ஆதரவை வழங்க நாங்கள் நிறைய செய்கிறோம் என்று நினைக்கிறேன், ஆனால் எப்போதும் மேலும் அதிகமாக செய்ய வேண்டும் என்ற கோரிக்கைகள் இருக்கும்' என்று குறிப்பிட்டார்.

மவுய் மக்கள் நிலைமையை இப்படி பார்க்கவில்லை. முதலாவதாக, காணாமல் போன மற்றும் இறந்த குடும்ப உறுப்பினர்களைக் கையாள்வதற்கு கூடுதலாக, இப்போது தீவில் ஆயிரக்கணக்கான மக்கள் வீடற்றவர்களாக ஆக்கப்பட்டுள்ளனர். பெடரல் அவசர மேலாண்மை நிறுவனம் (FEMA) மற்றும் பசிபிக் பேரிடர் மையம் ஆகியவற்றின் படி, சுமார் 4,500 பேருக்கு தங்குமிடம் தேவைப்படுகிறது.

இரண்டாவதாக, தொழிலாள வர்க்க குடியிருப்பாளர்களுக்கு அவசரமாகத் தேவையான உணவு மற்றும் பணத்தை வழங்குவது தன்னார்வலர்களால் முழுமையாக சமூக மட்டத்தில் ஒழுங்கமைக்கப்பட்டு நடத்தப்பட்டு வருகிறது என்ற செய்திகளும் உலக சோசலிச வலைத் தளத்திற்கு வந்துள்ளன. அரசாங்கத்தின் மீதான அதிருப்தி, கோபம் மற்றும் அவநம்பிக்கையின் அளவு மக்கள் மத்தியில் தெளிவாக காணக்கூடியதாக உள்ளது.

மவுய் தீவு உண்மையில் அமெரிக்கா முழுவதும் நிலவும் சமூக சமத்துவமின்மையின் ஒரு நுண்ணிய வடிவமாகும். சமீபத்திய தசாப்தங்களில், ஹவாயில் வருமான ஏற்றத்தாழ்வு துரிதப்படுத்தப்பட்டுள்ளது. 2022 இல் ஒரு ஆய்வின்படி, மவுய் கவுண்டியில் உள்ள Asset Limited, Income Contrained, Employed (ALICE) குடும்பங்களின் விகிதம், அதாவது $35,000க்கு மேல் வருமானம் உள்ள தனிநபர்கள் அல்லது $72,000 வருமானம் கொண்ட நான்கு பேர் கொண்ட குடும்பம், 52 சதவீதம் அல்லது மக்கள்தொகையில் பாதிக்கும் மேற்பட்டவர்கள் என உயர்ந்துள்ளது. இது ஹவாய் மாநிலத்தில் மிக அதிக விகிதமாகும்.

இதற்கிடையில், மவுய் என்பது உலகின் சில செல்வந்தர்களுக்கு சொந்தமான சொத்துக்கள் மற்றும் குடியிருப்புகளின் இருப்பிடமாகும். முன்னாள் CEO மற்றும் Amazon நிறுவனர் Jeff Bezos 78 மில்லியன் டாலர் பெறுமதியான 14-ஏக்கர் தோட்டத்தை வைத்துள்ளார், மவுய் பள்ளத்தாக்கு தீவில் உள்ள La Perouse விரிகுடாவில் ஆயிரக்கணக்கான ஏக்கர் செயலற்ற எரிமலை வயல்களால் சூழப்பட்டுள்ளது. ஓப்ரா வின்ஃப்ரே, 2.5 பில்லியன் டாலர் தனிப்பட்ட சொத்துக்களுடன், தீவில் 2,000 ஏக்கர் நிலத்தை வைத்திருக்கிறார்.

மவுயில் சொத்து வைத்திருக்கும் மற்ற பில்லியனர்களில் Paypal இணை நிறுவனர் பீட்டர் தியேல், என்விடியா CEO ஜென்சன் ஹுவாங் மற்றும் மென்பொருள் அதிபர் டேவிட் டஃபீல்ட் ஆகியோர் அடங்குவர். Facebook (Meta) CEO Mark Zuckerberg ($107 பில்லியன்) மற்றும் Oracle CEO Larry Ellison ($141 பில்லியன்) ஆகியோர் மவுயிற்கு அருகிலுள்ள ஹவாய் தீவுகளான Lanai மற்றும் Kauai இல் ஆயிரக்கணக்கான ஏக்கர்களை வைத்துள்ளனர்.

இந்த கோடீஸ்வரர்களும் மற்றவர்களும் பல தசாப்தங்களாக ஹவாயில் நிலம் மற்றும் வீடுகளை வாங்கியுள்ளனர், பொதுவாக விடுமுறை இடங்களாகவும், மற்றும் தங்கள் சொத்துக்களை வைத்திருப்பதற்கான இடமாகவும் இதனைக் கருதுகின்றனர். இந்த நபர்களில் சிலர் மவுய் பேரழிவு குறித்து மவுனமாக இருக்கும்போது, மற்றவர்கள் முற்றிலும் மக்கள் தொடர்பு நோக்கங்களுக்காக தொண்டு நடவடிக்கைகளுடன் முன்வந்துள்ளனர்.

முதலாளித்துவ வர்க்கம் மற்றும் அதன் நிறுவனங்களின் குற்றவியல் அலட்சியத்தை நேரடியாக அம்பலப்படுத்திய புயல்கள், பூகம்பங்கள், சுனாமிகள், சூறாவளிகள் மற்றும் பிற சுற்றுச்சூழல் பேரழிவுகள் போன்ற மோசமான இயற்கை பேரழிவுகளில் மவுய் காட்டுத்தீ ஒன்றாகும். எடுத்துக்காட்டாக, 2005 ஆம் ஆண்டில் கத்ரீனா சூறாவளி ஏற்பட்டதில், நியூ ஓர்லியன்ஸ் நகரம் பேரழிவிற்குள்ளானது மற்றும் 1,392 பேர் தங்கள் உயிர்களை இழந்தனர்.

பூமியின் மற்ற எல்லா இடங்களைப் போலவே ஹவாயிலும் உருவாகியுள்ள நிலைமைகள், காலநிலை மாற்றத்தின் பேரழிவுத் தாக்கத்தை நிறுத்துவதற்குத் தேவைப்படுவது, முழு இலாப அமைப்புமுறைக்கு எதிராக சர்வதேச அளவில் தொழிலாள வர்க்கத்தை அணிதிரட்டுவதுதான் என்பதை உறுதிப்படுத்துகிறது. மனித வாழ்க்கைக்கு மேலாக தனியார் செல்வக் குவிப்பை வைத்திருக்கும் நிதிய உயரடுக்கின் கைகளில் இருந்து சமூகத்தின் வளங்களை எடுத்துக்கொள்வதன் மூலமும், மற்றும் அவற்றை ஒரு திட்டமிட்ட, சோசலிச அடிப்படையில் மறுசீரமைப்பதன் மூலமும் மட்டுமே தொழிலாள வர்க்கம், முதலாளித்துவத்தால் உருவாக்கப்பட்ட பேரழிவுகளைத் தடுக்க முடியும்.