மொழிபெயர்ப்பின் மூலக் கட்டுரையை இங்கே காணலாம்

இஸ்ரேல் அதன் தற்போதைய இனப்படுகொலையின் ஒரு பகுதியாக முற்றுகையிடப்பட்ட பகுதிக்குள் உணவு, தண்ணீர், எரிபொருள் மற்றும் பொருள் விநியோகங்கள் நுழைவதைத் தடுக்க கடந்த வாரம் எகிப்திற்குள் நுழையும் எல்லைக் கடவையை மூடியதிலிருந்து, ரஃபாவுக்கு அருகிலுள்ள கான் யூனிஸில் உள்ள ஐரோப்பிய மருத்துவமனையில் 20 க்கும் மேற்பட்ட அமெரிக்க மருத்துவர்கள் மற்றும் சுகாதாரப் பணியாளர்களை உள்ளடக்கிய இரண்டு மருத்துவக் குழுக்கள் சிக்கியுள்ளன.

இந்த சுகாதாரப் பணியாளர்களின் அவலநிலை குறித்த Intercept இல் Ryan Grim மற்றும் Hind Khoudary இன் மே 13, 2024 அறிக்கையின்படி, இஸ்ரேலிய பாதுகாப்புப் படைகளின் (IDF) நடவடிக்கைகள் ஏற்கனவே பேரழிவுகரமான மனிதாபிமான நெருக்கடியை, வெறும் 25 சதுர மைல்கள் (65 சதுர கிலோமீட்டர்) பரப்பளவைக் கொண்ட ரஃபாவில் சிக்கியுள்ள கிட்டத்தட்ட 1.5 மில்லியன் பட்டினி மற்றும் காயமடைந்த மக்களின் உயிர்களுக்கு உடனடி அச்சுறுத்தலாகவும் ஆபத்தாகவும் ஆக்கியுள்ளன,

தனது சமூக ஊடகங்களில் எழுதிய கிரிம், மருத்துவர்கள் மற்றும் மருத்துவ ஊழியர்கள் கடுமையான நீரிழப்பை எதிர்கொள்வதால் தண்ணீரை பங்கீடு செய்கிறார்கள், குறைந்தது ஒரு உறுப்பினராவது ஐ.வி சொட்டு மருந்தில் இருக்கிறார். மே 1 அன்று, ஒரேகானில் இருந்து வந்த தன்னார்வ தீக்காய அதிர்ச்சி செவிலியர் மோனிகா ஜோன்ஸ்டன், வாஷிங்டன் போஸ்ட் க்கு கூறுகையில், அவர்கள் “பாதுகாப்பாக வெளியேற வழி இல்லாமல் காஸாவில் சிக்கித் தவிக்கின்றனர், புதிய உதவியோ அல்லது பொருட்களோ வரவில்லை” என்றார்.

ஐக்கிய நாடுகள் சபையின் (ஐ.நா.) பாதுகாப்பு மற்றும் தற்காப்புத் துறையின் (டி.எஸ்.எஸ்) ஊழியரான முன்னாள் இந்திய ராணுவ அதிகாரி கேர்னல் வைபவ் அனில் காலே (46) திங்கள்கிழமை கொல்லப்பட்டபோது மருத்துவப் பணி எதிர்கொள்ளும் மோசமான நிலைமை குறிப்பாகத் தெளிவாகத் தெரிந்தது. அவர் பயணித்த ஐ.நா. வாகனம், அதன் ஐ.நா சின்னம் மற்றும் கொடியால் அடையாளம் காணப்பட்டு, ரஃபா வழியாக ஐரோப்பிய மருத்துவமனைக்குச் சென்றபோது, இஸ்ரேலிய இராணுவத்தால் கொல்லப்பட்டார்.

இந்த சம்பவம் குறித்து, மருத்துவர்களில் ஒருவரின் குடும்ப உறுப்பினர் இன்டர்செப்ட் பத்திரிகைக்கு, “அவர்களை மீட்கும் பாதையாக கருதப்பட்ட ஒரு கார் சுடப்பட்டது மற்றும் ஐ.நா ஊழியர்கள் கொல்லப்பட்டனர் மற்றும் காயமடைந்தனர் என்பதை நாங்கள் அறிவோம். [மேலும்] ஒரு பாதுகாப்பான வழியைப் பெறுவதற்கும் வெளியேறுவதற்கும் அவர்களின் திறனைக் குறித்து நாங்கள் அஞ்சுகிறோம். மருத்துவமனையைச் சுற்றி ஷெல் தாக்குதல்கள் நடப்பதையும் ஊழியர்கள் ஜன்னல்களில் இருந்து விலகி இருக்குமாறு கூறப்பட்டிருப்பதையும் நாங்கள் அறிவோம்” என்று தெரிவித்தார்.

மருத்துவ தொழிலாளர்களின் அவநம்பிக்கையான நிலைமை குறித்து வாஷிங்டன் போஸ்ட் நிருபர் கேள்வி எழுப்பியதைத் தொடர்ந்து, திங்களன்று ஒரு பத்திரிகையாளர் சந்திப்பில், வெளியுறவுத்துறை செய்தித் தொடர்பாளர் வேதாந்த் படேல் கூறுகையில், “இந்த முயற்சிகளில் என்ன சம்பந்தப்பட்டிருந்தது என்பதற்கான செயல்பாட்டு அல்லது தளவாட விபரங்கள் குறித்து எனக்கு உறுதியாகத் தெரியவில்லை, ஆனால் தற்போது காஸாவை விட்டு வெளியேற முடியாது என்ற உண்மையை இந்த அமெரிக்க குடிமக்கள் —மருத்துவர்கள் மற்றும் மருத்துவ வல்லுனர்கள்— குறித்து எங்களுக்கு தெரியும் என்பதை நான் கூற முடியும். நான் முன்னர் கூறியதைப் போல, இந்த எல்லை கடக்கும் இடங்களை நாங்கள் கட்டுப்படுத்தவில்லை, இது அமெரிக்க குடிமக்களின் பாதுகாப்புக்கு மிகவும் தாக்கங்களைக் கொண்ட நம்பமுடியாத அளவிற்கு சிக்கலான சூழ்நிலை ஆகும்,” என்றார்.

பின்னர் வழக்கமான வெற்று மறுப்பையும் சேர்த்துக் கொண்ட அவர், “ஆனால் இந்த பிரச்சினையில் இஸ்ரேல் அரசாங்கத்துடனும் எகிப்திய அரசாங்கத்துடனும் நாங்கள் தொடர்ந்து வேலை செய்து வருகிறோம்” என்று தெரிவித்தார்.

காலே கொல்லப்பட்டது காஸாவில் ஒரு சர்வதேச ஐ.நா ஊழியரின் முதல் படுகொலை ஆகும். எவ்வாறிருப்பினும், அமெரிக்கா மற்றும் ஐரோப்பிய ஒன்றியத்தின் தளராத ஆதரவுடன், காஸாவில் அதன் இனப்படுகொலையில், இஸ்ரேல் காஸா மக்களுக்கு மிகவும் மட்டுப்படுத்தப்பட்ட ஆதரவையும் சகித்துக் கொள்ள மாட்டாது என்ற அடிப்படை பிரச்சினையை இந்தக் கொலை எழுப்புகிறது. காஸா மக்கள் தீவிர தப்பெண்ணத்துடன் ஒட்டுமொத்தமாக அழிக்கப்பட்டு வருகின்றனர்.

ஏப்ரல் தொடக்கத்தில் உலக மத்திய சமையலறையில் இருந்து ஏழு சர்வதேச உதவிப் பணியாளர்களைக் கொன்ற ஒருங்கிணைந்த வான்வழித் தாக்குதல் பைடனால் பாதுகாக்கப்பட்டது. இது, “தவறுகள்” அல்லது “தவறான அடையாளங்கள்” அல்ல. மருத்துவர்கள், செவிலியர்கள் மற்றும் மருத்துவத் தொழிலாளர்களும் கூட, அவர்கள் எந்த நாட்டைச் சேர்ந்தவர்களாக இருந்தாலும், தமது பரப்பெல்லையில் மட்டுப்படுத்தப்பட்டவர்களாக, பாலஸ்தீனியர்களுக்கு உதவியாளர்களாகவும் உடந்தையாக இருப்பவர்களாகவும் கருதப்படுகிறார்கள். மேலும், அவர்கள் இஸ்ரேலிய பாதுகாப்புப் படையால் காஸாவிற்குள் இராணுவ இலக்குகளாக வைக்கப்பட தகுதியானவர்களாக கருதப்படுகின்றனர். இந்த கண்ணோட்டத்தில், படேலின் கருத்துக்கள் வெறுமனே திட்டமிட்டவை மற்றும் கபடத்தனமானவை ஆகும்.

காஸா மக்கள் வேண்டுமென்றே பட்டினி கிடப்பதைப் போலவே, காஸாவின் சுகாதார உள்கட்டமைப்பை திட்டமிட்டு இலக்கு வைப்பது என்பது போரின் ஒரு தற்செயலான விளைவு அல்ல, மாறாக இஸ்ரேலின் இனப்படுகொலை தாக்குதலின் ஒரு முக்கிய பகுதியாகும்.

ஏழு மாத கால தாக்குதலில், மருத்துவர்கள் மற்றும் சுகாதாரப் பணியாளர்கள் திட்டமிட்டு இலக்கு வைக்கப்பட்டுள்ளனர். கிட்டத்தட்ட 500 மருத்துவர்கள் மற்றும் முதலுதவி உதவியாளர்கள் கொல்லப்பட்டுள்ளனர். 1,500க்கும் மேற்பட்டோர் காயமடைந்துள்ளனர், 300க்கும் மேற்பட்டோர் இஸ்ரேலால் கைது செய்யப்பட்டுள்ளனர்.

பாலஸ்தீனிய ஆணையத்தின் கூற்றுப்படி, காஸாவின் 80 சதவீதத்திற்கும் அதிகமான சுகாதார மையங்கள் இப்போது சேவையில் இல்லை. மீதமுள்ளவை நடந்து வரும் பாரிய உயிரிழப்பு நிகழ்வுக்கு சிகிச்சையளிக்க தேவையான அத்தியாவசிய பொருட்களின் பற்றாக்குறையுடன் ஓரளவு செயல்படுகின்றன. யுனிசெஃப் சமீபத்தில் ஐரோப்பிய மருத்துவமனையை ரஃபாவின் “கடைசி உயிர்நாடி” என்று விவரித்தது மிகைப்படுத்தப்பட்ட கூற்று அல்ல.

ஏப்ரல் 19 அன்று, ஆக்கிரமிக்கப்பட்ட மேற்குக் கரையில் உள்ள ஆஃபர் சிறைச்சாலையில் இஸ்ரேலிய அதிகாரிகளால் காவலில் வைக்கப்பட்டிருந்தபோது, பிரபல பாலஸ்தீனிய அறுவை சிகிச்சை நிபுணர் டாக்டர் அட்னான் அல்-புர்ஷ் (50) (Dr. Adnan Al-Bursh) இறந்துள்ளார். அவரது மரணம் இஸ்ரேலின் தாக்குதலின் கொடூரமான பாதையை மட்டுமே உறுதிப்படுத்துகிறது.

காஸா நகரில் உள்ள அல்-ஷிஃபா மருத்துவமனையின் எலும்பியல் துறைத் தலைவரான டாக்டர் அல்-புர்ஷ், ஜபல்யா அகதிகள் முகாமில் தரைவழி படையெடுப்பின் போது அல்-அவ்தா மருத்துவமனையில் நோயாளிகளுக்கு சிகிச்சையளித்துக் கொண்டிருந்தார். அவர் சக ஊழியர்களுடன் இஸ்ரேலிய பாதுகாப்புப் படையினரால் டிசம்பரில் கைது செய்யப்பட்டார். அவர் நான்கு மாதங்களுக்கும் மேலாக தடுத்து வைக்கப்பட்டிருந்த நிலையில் இறந்துள்ளார். சி.என்.என் படி, அவரது உடல் மற்றும் மரணத்திற்கான காரணம் இன்னும் வெளியிடப்படவில்லை. இருப்பினும், விடுவிக்கப்பட்ட அல்-புர்ஷின் சக கைதிகளில் ஒருவர், மருத்துவர் சித்திரவதை செய்யப்பட்டு கொல்லப்பட்டதாகக் கூறினார்.

இஸ்ரேலிய படைகளால் தடுத்து வைக்கப்பட்டுள்ள பாலஸ்தீனியர்கள் திட்டமிட்டு சித்திரவதை செய்யப்படுவது பல்வேறு ஆதாரங்களால் போதுமான அளவு உறுதிப்படுத்தப்பட்டுள்ளது மற்றும் ஆவணப்படுத்தப்பட்டுள்ளது, இதற்காக வெள்ளை மாளிகையும் பைடெனும் கண்டும் காணாமல் உள்ளனர். பலர் நிர்வாணமாக்கப்பட்டு, கண்கள் கட்டப்பட்டு, ஜிப் டைகளால் கைவிலங்கிடப்பட்டு படுக்கையில் கட்டப்பட்டுள்ளனர். நீண்ட காலமாக கைவிலங்கிடப்பட்டதால் ஏற்பட்ட காயங்களால் பலரின் கைகள் துண்டிக்கப்பட்டுள்ளன. உடல் ரீதியாகவும், மன ரீதியாகவும் அவர்கள் மீது சித்திரவதைகள் மேற்கொள்ளப்பட்டு வருகிறது. ஒரு இரகசிய வெளியீட்டாளர் சிஎன்என் இடம் கூறியதைப் போல, “உளவுத் தகவல்களைச் சேகரிப்பதற்காக அவர்கள் தாக்கப்படவில்லை. அவை பழிவாங்கும் நோக்கில் செய்யப்பட்டவை” என்றார்.

அல்-புர்ஷின் மரணம் குறித்து, அவரது நண்பரும் அல்-ஷிஃபா மருத்துவமனையின் இயக்குநருமான டாக்டர் மர்வான் அபு சாதா கூறுகையில், “[இது] அவரது குடும்பத்தினர், அல்-ஷிஃபா மருத்துவமனையின் மருத்துவ ஊழியர்கள் மற்றும் டாக்டர் அட்னானின் நோயாளிகள் அனைவருக்கும் இதயத்தை உடைக்கும் செய்தியாகும். இது நாங்கள் எதிர்பார்த்த கடைசி விஷயம், இந்த செய்தியை மனித ஆன்மா தாங்குவது கடினம்.

செவிலியர் மோனிகா ஜோன்ஸ்டன், அவரது கையில் நரம்பு வழியே கோடு போடப்பட்டிருப்பதைக் காண முடிகிறது, களத்தில் தற்போதைய நிலைமை குறித்து ஒரு அதிர்ச்சியூட்டும் விவரிப்பை வழங்கினார்:

ஒரு மனிதனாக, குழந்தைகளுக்கு, பெண்களுக்கு, அனைவருக்கும் இங்கே நடக்கும் கற்பனை செய்ய முடியாத துன்பத்தை பார்த்து நீங்கள் விலகிச் செல்ல செய்ய முடியாது. உதாரணமாக, அறுவை சிகிச்சை அறையில் ஒரு சிறுவனுக்கு நான் உதவினேன், அவன் டுனா டப்பாவை திறந்து கொண்டிருந்தான். அவன் ஒரு கையையும், மற்றொரு கையின் ஒரு பகுதியையும் இழந்திருந்தான். அவனது கால்கள் அகற்றப்பட வேண்டியிருந்தது. இது சரியில்லை. அதற்கு மேல், என் வாழ்க்கையில் நான் கண்டிராத அதிர்ச்சியின் அளவு அதிகரித்துள்ளது.

முதலாம் தர தீக்காயம் மற்றும் அதிர்ச்சி மையத்தில் பணிபுரியும் நான் ஒரு வருடத்தில் கையாண்ட இந்த அளவிலான ஒரு சில காயங்களை என்னால் கணக்கிட முடியும். ஒரே நாளில் நடந்த சில புதிய துயரங்களை இங்கே நான் கையாள்கிறேன். இப்போது, இந்த நோயாளிகளில் ஒருவரை கவனித்துக்கொள்ள எடுக்கும் வளங்களைப் பற்றி சிந்தியுங்கள். அமெரிக்காவில், சில நேரங்களில் நாம் அதற்கு பற்றாக்குறையாக இருக்கிறோம். இங்கு, புதிய உதவிப் பொருட்கள் எதுவும் வராததால், உங்களால் அதைச் செய்ய முடியாது. இந்த மக்களை உங்களால் வாழ முடியாது.

இப்போது எல்லை மூடப்பட்டு, ரஃபா மீதான படையெடுப்பு நடந்து வருவதால், ஊழியர்கள் தங்கள் சொந்த பாதுகாப்பு மற்றும் குடும்பத்தின் பாதுகாப்பிற்கு பயந்து வேலைக்கு வரவில்லை. எனவே, பாதிக்கும் குறைவான செவிலியர்கள் மற்றும் மருத்துவர்களுடன் ஐ.சி.யூ உள்ளது. அன்றொரு நாள் இரண்டு மருத்துவர்கள் மூன்று ஐ.சி.யு.க்களில் சுற்றித் திரிவதைப் பார்த்தேன். செவிலியர்கள், மருத்துவர்கள் மற்றும் துப்புரவு பணியாளர்கள், அனைவரும் சோர்வடைந்துள்ளனர் ... எங்களிடம் பொருட்கள் இல்லை; அதை பராமரிக்க நம்மிடம் மனிதர்கள் இல்லை.

“போர்நிறுத்தத்திற்காக பிச்சை எடுக்க அவர்களின் உள்ளூர் அரசாங்கங்களை அணுகுமாறு நான் எவரிடமும் கெஞ்சுகிறேன், இதனால் எங்களுக்கு அதிக உதவிகள், அதிக விநியோகங்கள், அதிக மக்கள் கிடைக்கும், மேலும் எங்கள் பணியை விட்டு வெளியேற வேண்டிய நேரம் வரும்போது நாங்கள் பாதுகாப்பாக வெளியேற முடியும். இந்த மக்களுக்கு எங்கள் உதவி தேவை. ப்ளீஸ் ஹெல்ப் பண்ணுங்க” என்று அவர் கேட்டுக் கொண்டார்.

Loading Tweet ...

Tweet not loading? See it directly on Twitter

பைடென் மற்றும் அவரது கூட்டாளிகளால் இஸ்ரேலின் இராணுவ நடவடிக்கைக்கு நிதி மற்றும் சடரீதியான ஆதரவு வழங்கப்படுவதைக் கொண்டு —அமெரிக்க காங்கிரஸின் இருகட்சி வாக்கெடுப்பில் கூடுதலாக 26.4 பில்லியன் டாலர் உட்செலுத்தப்பட்டுள்ளது— இதுபோன்ற முறையீடுகள் ஏகாதிபத்தியவாதிகளின் செவிடன் காதுகளில் மட்டுமே விழும். அவர்கள் இஸ்ரேலின் தாக்குதலை மத்திய கிழக்கில் ஒரு பரந்த புவிசார் அரசியல் சூழ்ச்சியாக பார்க்கின்றனர். உண்மையில், நடந்து கொண்டிருக்கும் இனப்படுகொலையை எதிர்க்கவும், முழு ஆளும் வர்க்கத்தாலும் தீவிரப்படுத்தப்பட்டு வரும் போர் உந்துதலை முடிவுக்குக் கொண்டுவரவும் சர்வதேச தொழிலாள வர்க்கத்திற்கு இந்த வேண்டுகோள் செல்ல வேண்டும். பாலஸ்தீனிய மக்கள் ஒட்டுமொத்தமாகப் படுகொலை செய்யப்படுவதை முடிவுக்குக் கொண்டு வருவதற்கும், இன்னும் கண்ணியமானவர்கள் காட்டுமிராண்டித்தனத்திற்குள் செல்வதைத் தடுப்பதற்குமான சடரீதியான வழிவகைகளைக் கொண்ட, ஒரே சக்தி இந்த பூமியில் குவிந்துள்ள செல்வம் முழுவதையும் உற்பத்தி செய்யும் தொழிலாள வர்க்கம் ஆகும்.