மொழிபெயர்ப்பின் மூலக் கட்டுரையை இங்கே காணலாம். 

பிரிட்டனின் தொழிற் கட்சி அரசாங்கத்தின் மீது ஜெஃப்ரி எப்ஸ்டீன் நெருக்கடியின் தாக்கமானது, பிரதம மந்திரி கெய்ர் ஸ்டார்மரின் அரசியல் நிலைத் தன்மையையே இப்போது அச்சுறுத்தும் கட்டத்தை எட்டியுள்ளது.

பீட்டர் மண்டேல்சனுக்கும், பாலியல் குற்றவாளி ஜெஃப்ரி எப்ஸ்டீனுக்கும் இடையே உள்ள நெருங்கிய தொடர்புகளை முழுமையாக அறிந்திருந்த ஸ்டார்மர், டிசம்பர் 2024 இல் அவரை அமெரிக்க தூதராக நியமித்தார். அமெரிக்க நீதித்துறை அண்மையில் வெளியிட்ட ஆவணங்களின்படி, மண்டெல்சன் எப்ஸ்டீனுக்காகப் பெருமளவில் பரப்புரை செய்ததோடு, அவருக்குத் தர வேண்டிய அரசு இரகசியங்களைக் கசியவிட்டதும் தெரிய வந்துள்ளது.

“இருளின் இளவரசன்” என்று அழைக்கப்படும் மண்டெல்சன், டோனி பிளேயரின் ஆட்சிக் காலத்தில் உருவான நிதியியல் தன்னலக்குழுவுடனான புதிய தொழிற் கட்சியின் பிணைப்பின் அடையாளமாகத் திகழ்ந்தார். “மக்கள் அளவற்ற செல்வந்தர்களாவதைக் கண்டு நான் மிகுந்த நிம்மதியடைகிறேன்” என்று அவர் கூறிய புகழ்பெற்ற வாக்கியமே இதற்குச் சான்றாகும்.

கோர்பினியவாதிகளின் படுதோல்விக்குத் பிறகு, தொழிற் கட்சியின் பிளேயரிச மரபின் வெற்றியாகவே மண்டெல்சன் அமெரிக்கத் தூதராக நியமிக்கப்பட்டதை ஸ்டார்மரும் அவரது கூட்டாளிகளும் கருதினர். அவரது அரசியல் மற்றும் வணிகப் பின்னணி —குறிப்பாக எப்ஸ்டீனுடனான நெருக்கமான தொடர்புகள்— புதிதாகப் பதவியேற்கவிருந்த ட்ரம்ப் நிர்வாகத்திற்கு ஒரு சமிக்ஞையை வழங்க முயன்றன. அதாவது, பொருளாதார ரீதியாகவும் இராணுவ ரீதியாகவும் தொழிற்கட்சி அரசாங்கம் ஒரு நம்பிக்கைக்குரிய கூட்டாளி என்பதையும், அது அதே குற்றவியல் தன்னலக்குழுவுடன் முழுமையாகப் பிணைந்துள்ளது என்பதையும் உறுதிப்படுத்த முயன்றன.

அந்த நேரத்தில் வாஷிங்டனுக்குச் விஜயம் செய்த ஸ்டார்மர், “ஜனாதிபதி ட்ரம்புடன் இணைந்து பணியாற்றுவதற்கும், எமது இரு நாடுகளுக்கும் இடையிலான விசேட உறவை மேலும் வலுப்படுத்துவதற்கும் பீட்டர்தான் சரியான நபர்” என்று அறிவித்தார். டவுனிங் ஸ்ட்ரீட் செய்திக்குறிப்பு ஒன்று, “அவர் தனது விரிவான வெளியுறவு மற்றும் பொருளாதாரக் கொள்கை அறிவு, வலுவான வணிகத் தொடர்புகள் மற்றும் அரசாங்கத்தின் உயர்மட்ட அனுபவங்களை இந்தப் பொறுப்பிற்குப் பயன்படுத்துவார்...” என்று குறிப்பிட்டது.

நிதியியல் தன்னலக் குழுவால் விலைக்கு வாங்கப்பட்ட ஸ்டார்மரின் தொழிற் கட்சி

எவ்வாறாயினும், எப்ஸ்டீன்-மண்டெல்சன் தொடர்பான நெருக்கடியில் ஸ்டார்மரை பதவி நீக்குவதிலிருந்து தொடங்கி, தொழிற்கட்சியின் “அழுக்கடைந்த தொழுவங்களை” சுத்தம் செய்வதற்கான ஒரு வாய்ப்பாக சித்தரிக்கும் அனைத்து முயற்சிகளும் ஒரு அரசியல் மோசடியாகும். கடந்த ஒரு வாரத்துக்கு முந்தைய நிகழ்வுகள், ஸ்டார்மரை பதவி நீக்குவது தொழிற்கட்சி அரசாங்கத்தின் பிற்போக்குத்தனமான அரசியல் தன்மையில் எந்த மாற்றத்தையும் ஏற்படுத்தாது என்பதை அடிக்கோடிட்டுக் காட்டுகின்றன. தொழிற் கட்சியின் நெருக்கடியானது, தொழிலாள வர்க்கம் இந்தச் சூழலில் சுயாதீனமாக தலையிட வேண்டிய அவசரத் தேவையை நேருக்கு நேர் கொண்டு வருகிறது. எல்லாவற்றிற்கும் மேலாக, தொழிலாள வர்க்கம் தனது சொந்தக் கட்சியை உருவாக்குவதன் மூலம் இதைச் செய்ய வேண்டியுள்ளது.

மக்கள் ஆதரவு கடுமையாக வீழ்ச்சியடைந்திருந்தபோதிலும், ஸ்டார்மர் இதுவரை எந்த தலைமைத்துவ சவாலையும் எதிர்கொள்ளவில்லை. ஏனெனில் அவரது ஆழமான ஊழல் மலிந்த அரசாங்கம் முழுவதுமே உலகளாவிய நிதியியல் தன்னலக் குழுவின் நலன்களுக்காக சேவை செய்வதில் உறுதியாக உள்ளது.

ஸ்டார்மருக்கு இறுதி அடியைக் கொடுப்பார்கள் என்று ஊடகங்களால் கருதப்பட்ட நாடாளுமன்றத் தொழிற் கட்சி (PLP) உறுப்பினர்கள் எவரும், பங்குச் சந்தைகளையும், லண்டன் மாநகர நிதி மையத்தையும் அல்லது பிரித்தானிய ஏகாதிபத்தியத்தின் சர்வதேச உறவுகளையும் பாதிக்கும் அபாயத்தை எடுக்கத் தயாராக இல்லை. தொழிற் கட்சி யாருக்கு சேவை செய்கிறதோ, அந்த ஆளும் வர்க்கத்தின் உயர்மட்ட அடுக்கின் பிடிவாதமான கோரிக்கை என்னவென்றால், தொழிலாள வர்க்கத்தின் மீதான போரின் மூலம் சிக்கன நடவடிக்கைகளைத் தொடர்ந்து திணிப்பதற்கும், தீவிரமடைந்து வரும் வர்த்தக மற்றும் ஏகாதிபத்தியப் போர்ச் சூழலில் பிரித்தானிய ஏகாதிபத்தியத்தின் உலகளாவிய நலன்களைப் பாதுகாப்பதற்கும் அரசியல் ஸ்திரத்தன்மை பேணப்பட வேண்டும் என்பதே ஆகும்.

கடந்த 9ம் திகதி காலை பிரிட்டிஷ் ஊடகங்கள், ஸ்டார்மரின் நிலைப்பாடு ஏற்றுக்கொள்ள முடியாததாகிவிட்டது என்ற ஊகங்களால் நிரம்பி வழிந்தன. நாடாளுமன்ற உறுப்பினர்களிடையே நிலவும் அதிருப்தி மற்றும் ஸ்டார்மரின் நெருங்கிய அரசியல் ஆலோசகர் மார்கன் மெக்ஸ்வீனியின் ஒப்புதலுடன் மண்டெல்சன் நியமிக்கப்பட்டதற்கு எதிராக, நாடாளுமன்ற உறுப்பினர்கள் காட்டிய சுயநலமான, போலியான சீற்றங்களை அவை சுட்டிக்காட்டின.

ஸ்டார்மர் தலைமைப் பதவிக்கு வருவதற்குப் பிரச்சாரம் செய்தவரும், மண்டெல்சனின் சீடருமான மெக்ஸ்வீனி மற்றும் அவரது நெருங்கிய வட்டத்தைச் சேர்ந்த மற்ற மூன்று உறுப்பினர்களின் இராஜினாமாவை ஏற்றுக்கொள்ள ஸ்டார்மர் தள்ளப்பட்டார். ஸ்கொட்லாந்து தொழிற்கட்சித் தலைவர் அனாஸ் சர்வார், பிரதமர் பதவி விலக வேண்டும் என்று செய்தியாளர் சந்திப்பில் கோரிக்கை விடுத்தபோது, ஸ்டார்மரின் உடனடி வீழ்ச்சி பற்றிய கணிப்புகள் உறுதியாவது போல் தோன்றியது. சர்வார், ஸ்டார்மரின் முக்கியப் போட்டியாளரான சுகாதாரச் செயலாளர் வெஸ் ஸ்டீரிங்குடன் இரகசியமாக இணைந்து செயல்பட்டதாகவும், மேலும் பல ராஜினாமா கோரிக்கைகள் வரும் என்றும் ஊகங்கள் எழுந்தன.

அதற்கு பதிலாக, அமைச்சரவையின் ஒவ்வொரு முக்கிய உறுப்பினரும் ஸ்டார்மருக்குத் தங்கள் ஆதரவை அறிவித்தனர். விருப்பமில்லாவிட்டாலும் கூட, ஸ்ட்ரீட்டிங் உட்பட அனைவரும் இதில் அடங்குவர். தனது அமைச்சரவை சகாக்கள் புடைசூழ, 9ம் திகதி மாலை தொழிற் கட்சி நாடாளுமன்ற உறுப்பினர்களிடையே பிரதமர் ஆற்றிய உரை, 30 முறை கைதட்டல்களால் இடைமறிக்கப்பட்டது. இதில் நான்கு முறை அனைவரும் எழுந்து நின்று பாராட்டு தெரிவித்தனர்.

மெக்ஸ்வீனியை அளவுக்கதிகமாகப் பாராட்டும் அளவுக்குத் துணிச்சலைப் பெற்ற ஸ்டார்மர், தன்னைத் தலைவர் பதவியிலிருந்து நீக்க முயல்வது, “எனது நாட்டை... மற்றவர்கள் செய்ததைப் போல ஒரு குழப்பத்திற்குள் தள்ளும்” என்று எச்சரிக்கை விடுத்தார்.

இந்தச் செய்தி ஸ்டார்மரின் வேண்டுகோள் மட்டுமல்ல, அவரது அழைப்பு இலண்டன் நகர நிதி மையத்திலும், பத்திரச் சந்தைகளிலும் எதிரொலித்தது. ஸ்டார்மரின் இராஜினாமா குறித்த முதலீட்டாளர்களின் கவலை காரணமாக, செப்டம்பர் மாதத்திற்குப் பிறகு டாலருக்கு எதிரான பிரித்தானிய பவுண்டின் மதிப்பு ஒரே நாளில் மிகப்பெரிய வீழ்ச்சியைச் சந்தித்தது. மேலும், எதிர்கால அரசாங்கக் கடன்கள் குறித்த முதலீட்டாளர்களின் கவலையை அளவிடும் 10 ஆண்டு மற்றும் 2 ஆண்டு கால அரசு கடன் வாங்கும் செலவுகளுக்கு இடையிலான வேறுபாடு, எட்டு ஆண்டுகளில் இல்லாத உச்சத்தைத் தொட்டது. தற்போது G7 நாடுகளில் பிரித்தானியாவின் கடன் வாங்கும் செலவுதான் மிக அதிகமாக உள்ளது.

பிப்ரவரி 6-ஆம் தேதியே, ஸ்டார்மரின் கூட்டாளிகள் குறித்து பைனான்சியல் டைம்ஸ் இதழ் பின்வருமாறு செய்தி வெளியிட்டிருந்தது:

ஸ்டெர்லிங் பவுண்ட்டின் மதிப்பை வீழ்த்தி, இடது நோக்கிய அரசியல் மாற்றம் ஏற்பட்டுவிடுமோ என்று அஞ்சிய முதலீட்டாளர்களை அதிரவைத்த பலநாள் குழப்பங்களுக்குப் பிறகு, பிரதமரை வீழ்த்தும் முயற்சி பொருளாதாரத்தில் பெரும் பேரழிவை ஏற்படுத்தும் என்று ஸ்டார்மரின் கூட்டாளிகள் தொழிற் கட்சி நாடாளுமன்ற உறுப்பினர்களை எச்சரித்துள்ளனர்.

பீட்டர் மாண்டல்சன் பிரபுவின் ஊழலை ஸ்டார்மர் கையாண்ட விதம் அவரது தலைமைக்கே அச்சுறுத்தலாக மாறியுள்ள நிலையில், அவர் பதவியிலிருந்து வெளியேற்றப்பட்டால் லிஸ் ட்ரஸ் காலத்தில் ஏற்பட்டது போன்ற வட்டி விகித உயர்வு அபாயம் ஏற்படும் என்று அவரது ஆதரவாளர்கள் எச்சரித்தனர்.

ஸ்டார்மரின் நெருங்கிய கூட்டாளி ஒருவர் கூறுகையில், “நிலையற்ற பத்திரச் சந்தைகள், தலைமைத்துவ மாற்றத்திற்கான விலையை நாட்டுக்கு மிகப்பெரிய சுமையாக மாற்றிவிடும்; இது முற்றிலும் பொறுப்பற்ற செயலாக இருக்கும்,” என்றார்.

ஜேடி ஸ்போர்ட்ஸ் (JD Sports) தலைவர் ஆண்டி ஹிக்கின்சன், வணிக வட்டாரங்களில் நிலவும் “பெரிய அச்சம்” குறித்து பைனான்சியல் டைம்ஸ் இதழிடம் கூறுகையில்: “நாங்கள் அவர்களின் வணிக ஆதரவு செய்திக்காகவே வாக்களித்தோம், ஆனால் இப்போது கொல்லைப்புறம் வழியாக இடது நோக்கிய அரசியல் மாற்றம் ஏற்பட்டுவிடுமோ என்ற அபாயம் உள்ளது,” என்றார். பத்திர நிதி மேலாளர் மைக் ரிடெல் இது குறித்துக் கூறுகையில், “பிரித்தானியாவின் புதிய தலைமை நிதி விரிவாக்கப் பாதையில் செல்ல முடிவெடுத்தால், அரசு கடன் பத்திர சந்தையும் ஸ்டெர்லிங் பவுண்ட்டும் பெரும் சரிவைச் சந்திக்க வாய்ப்புள்ளது,” எனத் தெரிவித்தார்.

வணிக வட்டாரங்களால் ஏற்றுக்கொள்ளப்படக்கூடிய நிலையில் இருந்த ஸ்டார்மருக்குப் பதிலாக வரக்கூடியவர்கள், அவரைப் பதிலீடு செய்யும் நல்ல நிலையில் இல்லை. தேசிய சுகாதார சேவையின் (NHS) மீது கடும் தாக்குதலைத் தொடுத்ததன் மூலம் ஆதரவைப் பெற்றிருந்த வெஸ் ஸ்ட்ரிடிங், மண்டெல்சனுடனான தனது நெருக்கமான உறவுகளால் மிகுந்த சிக்கலில் உள்ளார். அவர் தனது வாட்ஸ்அப் செய்திகளின் ஒரு சிறிய பகுதியை முன்கூட்டியே வெளியிட வேண்டிய கட்டாயத்திற்கு ஆளானார். அந்தச் செய்திகளில், அப்போதைய தூதராக இருந்த மண்டெல்சனிடம் ஸ்டார்மரின் பொருளாதாரச் செயல்பாடுகள் குறித்து தனது அதிருப்தியைத் தெரிவித்திருந்ததோடு, ஒவ்வொரு செய்தியின் முடிவிலும் ஒரு முத்தக் குறியீட்டையும் இட்டிருந்தார்.

பரந்த அளவிலான நாடாளுமன்றத் தொழிற்கட்சி உறுப்பினர்களின் தற்காலிக விசுவாசத்தையாவது உறுதிப்படுத்த, எப்ஸ்டீன்-மண்டெல்சன் ஊழலுடன் அத்தகைய நேரடித் தொடர்பு இருக்க வேண்டிய அவசியம் இருக்கவில்லை. அவர்களின் போலிச் சீற்றத்தையும் மீறி, ஸ்டார்மரால் மண்டெல்சன் ஏன் முன்னிறுத்தப்பட்டார் என்பது ஒவ்வொரு தொழிற்கட்சி நாடாளுமன்ற உறுப்பினருக்கும் நன்றாகவே தெரிந்திருந்தது.

கோர்பினிச இடதுகள் எவ்வாறு ஸ்டார்மருக்கு பாதை அமைத்துக் கொடுத்தனர்

இவை எதுவுமே ஸ்டார்மரின் நீண்டகால பிழைப்புக்கு உத்தரவாதம் அளிக்கவில்லை. ஆனால் ஸ்டார்மருக்கு மாற்றாக எந்தவொரு பதவியை தொடரவும், வாஷிங்டனுடன் கூட்டணி வைத்து தொழிலாளர் அரசாங்கத்தின் சிக்கன நடவடிக்கைகள் மற்றும் வர்த்தகம் மற்றும் இராணுவப் போர் நிகழ்ச்சி நிரலை ஆழப்படுத்தவும் முதலாளித்துவம் எவ்வாறு செயல்படுகிறது என்பதை இது காட்டுகிறது. இது தோல்வியுற்றால், நைஜல் பரேஜின் சீர்திருத்த UK கட்சி, அநேகமாக கன்சர்வேடிவ் கட்சியுடன் கூட்டணியமைத்து ஒரு மாற்று வலதுசாரி அரசாங்கத்திற்குத் தலைமை தாங்கத் தயார்படுத்தப்படுகிறது.

இத்தகைய ஏற்பாடுகளை ஆளும் வர்க்கம் செய்வதற்கு வசதியாக இருந்ததற்கான முழுப் பொறுப்பும், தொழிற் கட்சியின் கோர்பினிச இடதுகள் மற்றும் தொழிற்சங்க அதிகாரத்துவத்தின் மீதே சுமத்தப்பட வேண்டும். பிரித்தானிய மற்றும் உலக ஏகாதிபத்தியத்தின் ஆழமடைந்து வரும் நெருக்கடிக்கு மத்தியில், தொழிலாள வர்க்கம் தலையிடுவதைத் தடுப்பதற்கான முக்கிய வழிமுறைகளாக இவை செயல்பட்டன.

பிளேயரிஸ்டுகள் மற்றும் அவர்களின் குற்றவியல் அரசியல் சாதனைக்கு —முக்கியமாக ஈராக் மீதான சட்டவிரோதப் போருக்கு— எதிராகப் பொங்கி எழுந்த எதிர்ப்பின் காரணமாக 2015-இல் ஜெரமி கோர்பின் தொழிற் கட்சித் தலைவராகத் தேர்ந்தெடுக்கப்பட்டபோதே, மண்டெல்சனின் அரசியல் தலைவிதி அன்றே முடிவுக்கு வந்திருக்க வேண்டும்.

தனக்கு அளிக்கப்பட்ட மக்கள் ஆணையை மதித்து செயல்படுவதற்குப் பதிலாக, தொழிற் கட்சியின் “பரந்த சபை” என்ற பெயரில், கோர்பினை விரட்டியடிக்கத் தான் மேற்கொண்ட முயற்சிகளை வெளிப்படையாகவே மறைக்காத மண்டெல்சன் உள்ளிட்ட பிளேயரிஸ்டுகளிடம் கோர்பின் முழுமையாகச் சரணடைந்தார். மெக்ஸ்வீனியின் திறமையால் ஸ்டார்மர், கோர்பினை இடமாற்றம் செய்யவில்லை. மாறாக, கோர்பினின் கோழைத்தனத்தாலேயே அது நிகழ்ந்தது. ஒரு மாபெரும் மக்கள் இயக்கத்தைக் காட்டிக்கொடுத்த கோர்பின், இறுதியில் 2020-இல் நாடாளுமன்றக் கட்சியிலிருந்து இடைநீக்கம் செய்யப்பட்டு, 2024-இல் நீக்கப்பட்டார்.

தற்போது வெளிப்பட்டு வரும் இந்த ஊழலுக்கு மத்தியில், தொழிற் கட்சிக்குள் இன்னும் எஞ்சியிருக்கும் ஒருசில “இடதுகள்” கண்ணுக்குத் தெரியாதவர்களாகவே உள்ளனர். கோர்பினின் முன்னாள் நிழல் நிதி அமைச்சர் ஜோன் மெக்டொனால் மற்றும் சோசலிச பிரச்சாரக் குழுவின் தலைவர் ரிச்சர்ட் பர்கன் ஆகியோர், ஸ்டார்மர் பதவி விலக வேண்டும் என்று மென்மையாகப் பரிந்துரைப்பதோடு, தாங்கள் விசுவாசமாக இருக்கும் கட்சிக்குள்ளேயே ஒரு ஊழல் விசாரணை நடத்தப்பட வேண்டும் என்பதில் கவனம் செலுத்துகின்றனர். வலதுசாரிகளுக்கு எதிரான ஒரு போராட்டத்திற்கு அழைப்பு விடுப்பதற்குப் பதிலாக, “பொதுமக்களிடையே தொழிற் கட்சியை இவ்வளவு செல்வாக்கற்றதாக மாற்றியிருக்கும் மோசமான கோஷ்டிப் பூசல்களைக் கட்சியிலிருந்து அகற்றுவதற்கு நிறைய செய்ய வேண்டியுள்ளது” என்று பர்கன் அறிவித்தார்.

கோர்பினும், அவரது உங்கள் கட்சி (Your Party) என்ற அமைப்பின் அதிகாரப்பூர்வமற்ற இணைத் தலைவரான சாரா சுல்தானாவும் இதேபோன்ற மந்தமான போக்கையே வெளிப்படுத்தினர். கட்சியில் இருந்து நீக்கப்பட்டாலும் இல்லாவிட்டாலும், பிரித்தானிய அரசு மற்றும் தொழிற் கட்சியின் மீதான தனது அசைக்க முடியாத விசுவாசத்தை கோர்பின் மீண்டும் ஒருமுறை நிரூபித்தார். மண்டெல்சன் நெருக்கடிக்கு ஒரு தீர்வாக, எதனையும் மூடிமறைப்பதற்கென்று பிரித்தானிய ஆளும் வர்க்கத்தால் சோதித்து அறியப்பட்ட ஒரு முறையையே அவர் முன்மொழிந்தார்: அதாவது, தேசிய பாதுகாப்பைப் பாதுகாப்பதற்காக “பெரும்பாலும்” இரகசியமாக நடத்தப்படும் ஒரு பொது விசாரணையையே அவர் தீர்வாகக் கூறினார்

ஸ்டார்மர் நாட்டு மக்களிடையே உரையாற்றத் திட்டமிட்டுள்ளார் என்ற தவறான செய்திகளுக்குச் சாரா சுல்தானா கேலியாகப் பதிலளிக்கையில், “இது அவர் பதவி விலகும் உரையாக இருந்தால் நன்றாக இருக்கும்” என்று மட்டும் கூறினார்.

தொழிற்சங்க அதிகாரத்துவத்தைப் பொறுத்தவரையில், 18 மாத கால வேலைநிறுத்தப் போராட்ட அலைகளை அவர்கள் ஒடுக்கியதன் மூலமே ஸ்டார்மர் ஆட்சிக்கு வருவதற்கான பாதை அமைக்கப்பட்டது. நெருக்கடியில் சிக்கியிருந்த டோரி அரசாங்கத்திற்கு எதிராக ஒரு பொது வேலைநிறுத்தத்திற்கான கோரிக்கைகள் தொழிலாளர்களிடையே எழுந்து வந்த நிலையில், அந்தப் போராட்டங்களின் முக்கியத் தலைவர்கள் (இரயில், கடல்சார் மற்றும் போக்குவரத்து சங்கத்தின் மிக் லிஞ்ச், தகவல் தொடர்பு தொழிலாளர் சங்கத்தின் டேவ் வார்டு மற்றும் பல்கலைக்கழக மற்றும் கல்லூரி சங்கத்தின் ஜோ கிரேடி) “போதும் என்பது போதும்” என்ற பிரச்சாரத்தைத் தொடங்கினர். இதன் மூலம், தொழிலாளர்கள் ஒரு தொழிற் கட்சி அரசாங்கத்தைத் தேர்ந்தெடுப்பதில் தங்கள் நம்பிக்கையை வைக்குமாறு அவர்கள் வலியுறுத்தினர்.

ஸ்டார்மர் பதவி விலக வேண்டும் என்று இந்த வாரம் இரண்டு தொழிற்சங்கத் தலைவர்கள் மட்டுமே —தீயணைப்புப் படை சங்கத்தின் ஸ்டீவ் ரைட் மற்றும் போக்குவரத்து ஊதியப் பணியாளர்கள் சங்கத்தின் மரியம் இஸ்லாம்தோஸ்ட்— தங்கள் அமைப்பின் நிலைப்பாட்டிலிருந்து விலகி அழைப்பு விடுத்தனர்.

இந்த பரிதாபகரமான எதிர்வினை, கோர்பினிச இடதுசாரிகளுடன் தொழிலாள வர்க்கம் பெற்ற கசப்பான அரசியல் அனுபவத்தின் உச்சக் கட்டமாகும்.

2015-இல் கோர்பினின் தேர்தல், தொழிற் கட்சியின் பழைய சீர்திருத்தவாத திட்டத்திற்குத் திரும்புவதன் மூலம், பெருவணிகங்களுக்கு எதிராகத் தொழிலாள வர்க்கம் தன்னைத் தற்காத்துக் கொள்வதற்கும் போரை எதிர்ப்பதற்குமான ஒரு கருவியாக தொழிற் கட்சியை மாற்றும் வாய்ப்பாக பாராட்டப்பட்டது. பிரித்தானியாவின் போலி இடது போக்குகளான, சோசலிச தொழிலாளர் கட்சி; சோசலிசக் கட்சி மற்றும் இன்றைய புரட்சிகர கம்யூனிஸ்ட் கட்சியின் முன்னோடிகள் இந்த ஆரவாரத்திற்குத் தலைமை தாங்கின.

அதற்கு மாறாக, கோர்பின் ஒரு பேரழிவுகரமான தோல்விக்கே தலைமை தாங்கினார். அதன் விளைவாக, பிரித்தானிய வரலாற்றிலேயே மிகக் குறைந்த வாக்கு விகிதத்தைப் பெற்று ஸ்டார்மர் ஆட்சிக்கு வந்தார். பல மில்லியன் தொழிலாளர்கள் தொழிற் கட்சிக்கு வாக்களிக்க மறுத்ததற்கு முக்கியக் காரணம், பாலஸ்தீனியர்களுக்கு எதிரான இஸ்ரேலின் இனப்படுகொலைக்கு ஸ்டார்மர் ஆதரவு தெரிவித்ததே ஆகும்.

இருப்பினும், மீண்டும் ஒருமுறை இதே போன்றதொரு குரல் எழுப்பப்பட்டது. அதாவது, கோர்பின் ஒரு புதிய இடது சீர்திருத்தவாதக் கட்சிக்குத் தலைமை தாங்குவார் என்றும், அவருடன் மற்றொரு அதிருப்தியாளரான நாடாளுமன்ற உறுப்பினர் சாரா சுல்தானா மற்றும் காஸா இனப்படுகொலைக்கு எதிரான போராட்டத்தால் தேர்ந்தெடுக்கப்பட்ட முன்னாள் தொழிற் கட்சி மற்றும் தாராளவாத ஜனநாயகக் கட்சி சுயேச்சைகள் இணைவார்கள் என்றும் கூறப்பட்டது.

இதன் விளைவாக உருவான உங்கள் கட்சி (Your Party), அதன் பிறகு உட்பூசல்களால் நிலைகுலைந்தது. கோர்பின் அந்த அமைப்பின் வலதுசாரிப் பக்கத்திலேயே உறுதியாக நின்று கொண்டு, ஸ்டார்மர் அரசாங்கத்திற்கு எதிரான சோசலிசப் போராட்டத்திற்குச் சிறு அளவில் அழைப்பு விடுத்தவர்களைக் கூட வேட்டையாடினார்.

தொழிலாள வர்க்கத்தின் அரசியல் உரிமையற்ற நிலையை முடிவுக்குக் கொண்டு வருவதற்குப் பதிலாக, உங்கள் கட்சியானது தொழிலாள வர்க்கத்தை தொழிற்சங்க அதிகாரத்துவத்தின் தலைமைக்கும், பல்வேறு முதலாளித்துவ சார்பு குட்டி-முதலாளித்துவ அரசியல்வாதிகள், மதக் குழுக்கள், தன்னார்வத் தொண்டு நிறுவனங்கள் மற்றும் போராட்ட இயக்கங்களுக்கும் அடிபணியச் செய்யும் சமீபத்திய முயற்சியாகவே உருவெடுத்துள்ளது.

சீர்திருத்தவாதத்தின் அழிவும் புரட்சிகர அரசியலின் தேவையும்

ஸ்டார்மர் அரசாங்கத்திற்கு ஒரு பதிலடியை உருவாக்குவது என்பது, இத்தகையதொரு விகாரமான அமைப்பு உருவாவதற்குக் காரணமான புறநிலை காரணங்களைப் புரிந்துகொள்வதாகும்—இதன் மூலமே, தொழிற் கட்சிக்குப் பதிலாக தொழிலாள வர்க்கத்தின் புதிய கட்சியாகக் கட்டியெழுப்பப்பட வேண்டிய கட்சியின் தன்மையைப் புரிந்துகொள்ள முடியும்.

கடந்த பொதுத் தேர்தலுக்கு முன்னதாக, அனைத்துப் போலி-இடது குழுக்களும் முன்மொழிந்த “குறைந்த தீமை” என்ற அடிப்படையில் தொழிற் கட்சிக்கு வாக்களிக்கும் பொய்யை சோசலிச சமத்துவக் கட்சி நிராகரித்தது. தொழிற் கட்சி எப்போதும் பிரித்தானிய ஏகாதிபத்தியத்தின் அரசியல் பாதுகாவலராகவே செயல்பட்டு வந்துள்ளது என்பதையும், அது ஐக்கிய இராச்சியத்தின் இருகட்சி நாடாளுமன்ற ஆட்சி முறையின் ஒரு பகுதி என்பதையும் நாங்கள் விளக்கினோம். அதன் பங்கு என்னவென்றால், ஒரு வெளிப்படையான வணிக சார்பு கட்சியாகத் திகழும் கன்சர்வேடிவ் கட்சிக்கு எதிரான எதிர்ப்பைப் பாதுகாப்பான வழிகளுக்குத் திசைதிருப்புவது அல்லது 1997-இல் பிளேயரின் கீழ் செய்ததைப் போல, பலவீனமடைந்த டோரி (Tory) அரசாங்கத்தை அகற்றிவிட்டு அதன் அடிப்படை நிகழ்ச்சி நிரலைத் தொடருவது என்பதாகும்.

புதிய சீர்திருத்தவாதக் கட்சியை உருவாக்குவதற்கான முயற்சிகள் மூலம் தொழிற் கட்சியின் வலதுசாரிப் பரிணாமத்திற்குப் பதிலளிக்க முடியாது என்று நாங்கள் வலியுறுத்தினோம். அதன் பழைய சீர்திருத்தவாதக் கொள்கைகளைக் கைவிட்டு, சுதந்திர சந்தை முதலாளித்துவத்தின் தாட்செரிச (Thatcherite) ஆதரவாளராக அது மாறியது என்பது, உலக முதலாளித்துவத்திற்குள் ஏற்பட்ட அடிப்படை மாற்றங்களில் வேரூன்றியுள்ளது என்பதாகும்.

பூகோளமயமாக்கல் —அதாவது, பிரம்மாண்டமான நாடுகடந்த நிறுவனங்களை உள்ளடக்கிய உலகளாவிய உற்பத்தி முறையின் வளர்ச்சி மற்றும் உலகளாவிய ரீதியில் நகரக்கூடிய நிதி மூலதனப் பாய்ச்சலுடன் அவை ஒருங்கிணைக்கப்பட்டிருப்பது— தேசிய அரசின் ஒழுங்குமுறை வழிமுறைகள் மூலம் சமூகச் சலுகைகளை நடைமுறைப்படுத்துவதை சாத்தியமற்றதாக்கியுள்ளது.

சமூகத்தின் உச்சியில் ஏற்பட்டுள்ள பிரம்மாண்டமான செல்வக் குவிப்பு, குறைந்து வரும் இலாப விகிதங்கள் மற்றும் புற்றுநோய் எனப் பெருகி வரும் ஊக வணிகம் ஆகியவற்றின் விளைவாக, முன்னெப்போதையும் விட விகாரமான மற்றும் ஒட்டுண்ணி வடிவங்களை எடுத்துள்ள நிதியியல் தன்னலக் குழுவானது, உலகச் சந்தைகள் மற்றும் வளங்களைக் கட்டுப்படுத்துவதற்கான போராட்டத்தில் தனது போட்டித் தன்மையை உறுதி செய்வதற்காக, கடந்த கால சமூக ஆதாயங்களை அழிக்குமாறு தனது அரசியல் சேவகர்களிடம் கோருகிறது.

வர்த்தக மற்றும் இராணுவப் போர்களின் வெடிப்பு என்பது, சமூக சமரசத்திற்கும் ஜனநாயக ஆட்சிக்கும் முற்றுப்புள்ளி வைப்பதோடு, வர்க்கப் போர், அரசு ஒடுக்குமுறை மற்றும் வலதுசாரி பிற்போக்குத்தனத்தை நோக்கிய மாற்றத்தைக் குறிக்கிறது. இது அமெரிக்காவில் பாசிச சர்வாதிகாரத்தை நிலைநிறுத்த ட்ரம்ப் எடுக்கும் முயற்சிகள், ஐரோப்பா முழுவதும் அதிதீவிர வலதுசாரிக் கட்சிகளை ஊக்குவிப்பது, உக்ரேனில் கொள்ளையடிக்கும் ஏகாதிபத்தியப் போர், காஸா இனப்படுகொலை மற்றும் ஈரானில் ஆட்சி மாற்றத்திற்கான முன்னேறிய தயாரிப்புகள் ஆகியவற்றில் மிகத் தெளிவான வெளிப்பாடுகளைக் காண்கிறது.

தொழிலாள வர்க்கத்திற்குத் தேவையான புதிய கட்சியானது இந்த அரசியல் யதார்த்தங்களின்படி கட்டியெழுப்பப்பட வேண்டும். கோர்பின் மற்றும் சுல்தானாவின் உங்கள் கட்சி என இப்போது ஒழுங்கமைக்கப்பட்டுள்ள அதன் இடது பிரிவு உட்பட, தொழிற் கட்சி மற்றும் தொழிற்சங்க அதிகாரத்துவத்தின் அனைத்துப் பிரிவுகளிலிருந்தும் சுயாதீனமாக, தொழிலாள வர்க்கத்தை தொழில்துறை மற்றும் அரசியல் ரீதியாக அணிதிரட்டுவதே புதிய கட்சியின் பணியாகும்.

தொழிலாளர்களின் ஜனநாயக மற்றும் சமூக உரிமைகளைப் பாதுகாப்பதற்காக அவர்களை அணிதிரட்ட, ஒவ்வொரு பணிமனையிலும் மற்றும் சுற்றுப்புறத்திலும் சாமானிய உறுப்பினர்களைக் கொண்ட அமைப்புக்களை உருவாக்குவதை அது முன்னெடுக்க வேண்டும். தன்னலக்குழுவின் செல்வத்தைப் பறிமுதல் செய்வதன் மூலமும், அரசின் அடக்குமுறை அதிகாரங்களைச் ஒழிப்பதன் மூலமும், அரசியல் அதிகாரத்தைத் தொழிலாள வர்க்கத்தின் கைகளில் ஒப்படைப்பதன் மூலமும் மட்டுமே இறுதியில் இந்த உரிமைகளைப் பாதுகாக்க முடியும் என்பதை அது தெளிவுபடுத்த வேண்டும்.

எல்லாவற்றிற்கும் மேலாக, அத்தகைய கட்சியானது உலகத் தொழிலாள வர்க்கத்தின் சர்வதேச அமைப்புரீதியான, அரசியல் ஐக்கியத்தைக் கோர வேண்டும். உலகெங்கிலும் உள்ள தொழிலாளர்கள் தீவிரமடைந்து வரும் உலகப் போர், ஆழமடைந்து வரும் சமூக சமத்துவமின்மை, பாசிசம் மற்றும் சர்வாதிகாரத்தின் வளர்ச்சி போன்ற அதே அச்சுறுத்தல்களை எதிர்கொள்கின்றனர். இவை அனைத்தும் உலகளாவிய தீர்வுகளைக் கோருகின்றன. பூமியின் மிகவும் சக்திவாய்ந்த சமூக சக்தியான சர்வதேச தொழிலாள வர்க்கத்தால் மட்டுமே நிதியியல் தன்னலக்குழுவின் அதிகாரம், அதன் நிறுவனங்கள், வங்கிகள் மற்றும் அரசின் ஒடுக்குமுறை வழிமுறைகளைத் தோற்கடித்து, முதலாளித்துவ காட்டுமிராண்டித்தனத்திற்குப் பதிலாக சோசலிசத்தை நிலைநாட்ட முடியும்.

இதுவே நான்காம் அகிலத்தின் அனைத்துலகக் குழுவின் (ICFI) பிரித்தானியப் பிரிவான சோசலிச சமத்துவக் கட்சி (SEP) முன்வைக்கும் முன்னோக்காகும்.