மொழிபெயர்ப்பின் மூலக் கட்டுரையை இங்கே காணலாம்

கடந்த வாரம் தைவானுக்கு அமெரிக்க பிரதிநிதிகள் சபை சபாநாயகர் நான்சி பெலோசியின் ஆத்திரமூட்டும் பயணத்தை அடுத்து, தைவான் ஜலசந்தி முழுவதும் இராணுவ பதட்டங்கள் அதிகமாக உள்ளன. அமெரிக்க அணுசக்தி விமானம் தாங்கி கப்பலான யுஎஸ்எஸ் ரொனால்ட் ரீகன், அதன் தாக்குதல் குழுவுடன், தைவான் அருகே உள்ள கடற்பரப்பில் இருக்குமாறு உத்தரவிடப்பட்டுள்ளது, சீன இராணுவம் தொடர்ந்து நேற்று இராணுவப் பயிற்சிகளை அறிவித்துள்ளது.

'தைவான் தீவைச் சுற்றியுள்ள கடல் மற்றும் வான்வெளியில் நடைமுறை கூட்டுப் பயிற்சிகளை மேற்கொள்வது' மற்றும் 'கூட்டு நீர்மூழ்கி எதிர்ப்பு மற்றும் கடல் தாக்குதல் நடவடிக்கைகளை ஒழுங்கமைப்பதில் கவனம் செலுத்துவது' என சீனாவின் கிழக்கு ஒருங்கிணைக்கப்பட்ட கட்டளையகம் அறிவித்தது. பயிற்சியின் நேரம் மற்றும் இடம் பற்றிய குறிப்பு எதுவும் வழங்கப்படவில்லை.

தைவானை ஒட்டியுள்ள ஐந்து வெவ்வேறு மண்டலங்களில் போர்க்கப்பல்கள், போர் விமானங்கள் மற்றும் ஏவுகணை ஏவுதல்கள் சம்பந்தப்பட்ட முக்கிய சீன நேரடி-சூட்டு பயிற்சிகள் என தொடர்ச்சியான இராணுவ நடவடிக்கைகளை பின்பற்றுகின்றன, சில சந்தர்ப்பங்களில் தைவான் ஜலசந்தியில் இடைநிலைக் கோட்டைக் கடக்கின்றன. சீன இராணுவம் பல குறுகிய தூர பாலிஸ்டிக் ஏவுகணைகளை ஏவியது, இதில் பல ஜப்பானின் 200 கடல் மைல் பொருளாதார விலக்கு மண்டலத்திற்குள் (Economic Exclusion Zone) தரையிறங்கியது.

நேரடி-சூட்டு பயிற்சிகள் ஞாயிற்றுக்கிழமை நண்பகலில் முடிவடைந்தன, ஆனால் ஒரு சம்பவம் அல்லது மோதலுக்கான சாத்தியம் கடைசி நிமிடம் வரை அதிகமாக இருந்தது. பெயரிடப்படாத ஒரு ஆதாரம் ஆஸ்திரேலிய ஒளிபரப்புக் கூட்டுத்தாபனத்திடம், அந்த பயிற்சிகள் முடிவடைவதற்கு சற்று முன்பு, சீனா மற்றும் தைவானில் இருந்து தலா சுமார் 10 போர்க்கப்பல்கள் தைவான் ஜலசந்தியின் உத்தியோகபூர்வமற்ற இடைநிலைக் கோட்டை சுற்றியுள்ள நெருக்கமான இடங்களில் நகர்ந்தன. தைவான் ஜலசந்தியின் குறுகலான பகுதியில், சீன நிலப்பரப்பில் இருந்து தீவை பிரிக்கும் தைவான் ஜலசந்தி வெறும் 130 கிலோமீட்டர் அகலம் கொண்டது.

சீனாவின் கிழக்கு ஒருங்கிணைக்கப்பட்ட கட்டளையகம் தொடர்ந்து பயிற்சியில் ஈடுபட்டு வருவதாக அறிவித்ததற்கு தைவானின் வெளியுறவு அமைச்சகம் நேற்று கண்டனம் தெரிவித்தது, இராணுவ மிரட்டலுக்கு முகங்கொடுக்க தைவான் பின்வாங்காது என்று அறிவித்தது.

தைவானின் கருத்துக்கள், பெலோசியின் வருகைக்கு பெய்ஜிங்கின் பதிலைக் கண்டித்து வாஷிங்டனில் இருந்து திட்டமிடப்பட்ட விமர்சனங்களின் ஒரு பகுதியாகும். வெள்ளை மாளிகை அதிகாரிகள், அமெரிக்க அரசியல்வாதிகள் மற்றும் ஊடக வர்ணனையாளர்கள், ஆஸ்திரேலியா மற்றும் ஜப்பான் போன்ற அமெரிக்க இராணுவ நட்பு நாடுகளுடன் இணைந்து, சீனாவின் நடவடிக்கைகளை 'விகிதாசாரமற்றது', 'ஸ்திரமின்மை' மற்றும் 'ஆக்கிரமிப்பு' என்று வசைபாடினர்.

என்ன பாசாங்குத்தனம்! பெலோசியின் பயணம் நெருப்புடன் விளையாடுகிறது என்பதை பைடென் நிர்வாகம் நன்கு அறிந்திருந்தது, ஆரம்பத்தில் அதற்கு எதிராக கூட எச்சரித்தது, இது ஒரு மோதலைத் தூண்டும் ஆற்றலைக் கொண்டுள்ளது என்பதை அறிந்திருந்தது. ட்ரம்ப் மற்றும் பைடென் நிர்வாகங்கள் இரண்டும் 1979 ஆம் ஆண்டில் முறையான இராஜதந்திர உறவுகள் நிறுவப்பட்டதிலிருந்து அமெரிக்க-சீனா உறவுகளின் அடித்தளமாக இருந்த ஒரு சீனக் கொள்கையை வேண்டுமென்றே குறைமதிப்பிற்கு உட்படுத்தி வருகின்றன.

ஒரே சீனா கொள்கையின் கீழ், தைவான் உட்பட அனைத்து சீனாவின் சட்டபூர்வமான அரசாங்கமாக பெய்ஜிங்கை அங்கீகரித்த அமெரிக்கா, தைபேயுடனான இராஜதந்திர உறவுகளை முடித்துக் கொண்டது மற்றும் தீவில் இருந்து அனைத்து இராணுவப் படைகளையும் திரும்பப் பெற்றது. பல தசாப்தங்களாக மட்டுப்படுத்தப்பட்ட குறைந்த அளவிலான தொடர்புகளுக்குப் பின்னர், அமெரிக்கா தைவானுக்கான உயர்மட்ட அமெரிக்க வருகைகளை அதிகரித்தது மட்டுமல்லாமல், தீவில் அமெரிக்க துருப்புக்கள் இருப்பதை ஒப்புக் கொண்டதோடு தைவானுக்கான ஆயுத விற்பனையை வியக்கத்தக்க அளவில் உயர்த்தியுள்ளது.

அந்தச் சூழலில், அமெரிக்க ஜனாதிபதியின் வரிசையில் இரண்டாவது இடத்தில் உள்ள பெலோசியின் வருகை, ஒரு பதிலைத் தூண்டும் என்று கணக்கிடப்பட்டது. ரஷ்யாவின் தேசிய பாதுகாப்புக் கவலைகளைப் புறக்கணிப்பதன் மூலம், உக்ரேனை ஆக்கிரமிக்க அமெரிக்கா தூண்டியது போலவே, பைடென் நிர்வாகம் தைவானில் சீனாவுடன் ஒரு பினாமிப் போரைத் தூண்டும் நோக்கத்தில் உள்ளது.

சீனாவுடனான எந்தவொரு மோதலிலும் அமெரிக்கா தைவானுடன் இணையும் என்று பைடென் இப்போது மூன்று சந்தர்ப்பங்களில் அறிவித்துள்ளார் — இது 'மூலோபாய தெளிவற்ற தன்மை' என்ற நீண்டகால கொள்கையின் தெளிவான மீறலாகும். தைவான் ஜலசந்தி முழுவதும் உள்ளார்ந்த ஸ்திரமற்ற சூழ்நிலையை ஸ்திரப்படுத்த அமெரிக்கா முன்பு முயன்றது. பெய்ஜிங்கிற்கு எதிரான தைவானிய ஆத்திரமூட்டல்களைத் தடுப்பதற்காக, எல்லாச் சூழ்நிலைகளிலும், சீனாவுடனான போரில் தைவானுக்கு இராணுவ ஆதரவை அறிவிக்க இப்போது வரை அது மறுத்துவிட்டது.

இவை அனைத்தும், பெலோசியின் பயணம் உட்பட, தற்போதைய நிலையை மாற்றுவதற்கு வாஷிங்டன் எதுவும் செய்யவில்லை என்று அமெரிக்க உயர் அதிகாரிகள் மீண்டும் மீண்டும் கூறப்படும் கூற்றுக்களுக்கு பொய்யை கொடுக்கிறது. அமெரிக்கா மற்றும் சர்வதேச ஊடகங்கள் சீனா என்ன செய்து கொண்டிருக்கிறது என்பது பற்றிய ஊகங்கள் மற்றும் பிரச்சாரங்கள் மற்றும் தைவான் மீதான பெய்ஜிங்கின் ஆக்கிரமிப்பு நோக்கங்கள் பற்றிய எச்சரிக்கைகள் ஆகியவற்றால் நிறைந்துள்ளன.

உதாரணமாக, கார்டியன் அமெரிக்க பாதுகாப்புத் துறைக் கொள்கைத் தலைவர் கொலின் கஹிலை மேற்கோள் காட்டி, பெய்ஜிங் தைவான் நீரிணை முழுவதும் 'சலாமி-வெட்டு முறையில் (சிறிது சிறிதாக நடவடிக்கையில் ஈடுபடுதல்) ஒரு புதிய நிலையை அடைய' முயற்சிப்பதாகக் குற்றம் சாட்டியது. 'இது ஜலசந்தியில் உள்ள நடவடிக்கைகள்”, 'இந்த நடைமுறைகள், மையக் கோட்டைக் கடக்கும் கடல் மற்றும் வான்வழி சொத்துக்களின் எண்ணிக்கையானது தைவான் கரைக்கு நெருக்கமாக ஊர்ந்து செல்கிறது, அங்கு பெய்ஜிங் ஒரு வகையான புதிய இயல்பு நிலையை உருவாக்க முயற்சிக்கிறது என்பது தெளிவாகிறது” என்று அது கூறியது.

உண்மையில், அமெரிக்க ஏகாதிபத்தியம் தான் அதன் 'சலாமி-வெட்டு' மூலோபாயத்தை செயல்படுத்துகிறது —படிப்படியாக ஒரு சீனக் கொள்கையை ஒரு இறந்த கடிதமாக மாற்றி, தைவானை உச்சிவரை ஆயுதபாணியாக்கி, சீன நிலப்பகுதிக்கு நெருக்கமான முக்கியமான நீரில் ஆத்திரமூட்டும் காற்று மற்றும் கடற்படை நடவடிக்கைகளை நடத்துகிறது— தைவானில் நீடித்த இராணுவ மோதலில் சீனாவைத் தூண்டிவிடவும், சகதிக்குள் இழுத்துவிடவும் முயல்கிறது.

பெலோசியின் விஜயத்தை அடுத்து, அமெரிக்கா ஏற்கனவே புதிய ஆத்திரமூட்டல்களைத் தயாரித்து வருகிறது. கால் கார்டியனிடம், 'சர்வதேச சட்டம் எங்களை அனுமதிக்கும் இடத்தில், தைவான் ஜலசந்தி உள்ளடங்கிய இடங்களில், அமெரிக்க இராணுவம் தொடர்ந்து பறக்கும், பயணம் செய்யும் மற்றும் செயல்படும்' என்று கூறினார்.

கடந்த வாரம் வெள்ளை மாளிகையின் தேசிய பாதுகாப்பு கவுன்சில் செய்தித் தொடர்பாளர் ஜான் கிர்பி, 'அடுத்த சில வாரங்களில் தைவான் நீரிணை வழியாக விமான மற்றும் கடல்வழி போக்குவரத்தை அமெரிக்கா மேற்கொள்ளும்' என்று அறிவித்தார். அவர் எந்த விவரங்களையும் வழங்கவில்லை. இதுபோன்ற நடவடிக்கைகள் சீனாவுடன் பதட்டங்களை ஏற்படுத்துகின்றன என்பதை அறிந்திருந்தும், பைடென் நிர்வாகத்தின் கீழ், பென்டகன் தைவான் ஜலசந்தி வழியாக ஒரு மாதத்திற்கு ஒரு முறை போர்க்கப்பல்களை அனுப்பி வருகிறது.

அதே நேரத்தில், அமெரிக்க காங்கிரஸில் உள்ள சீன-எதிர்ப்பு பருந்துகள், தைவான் கொள்கைச் சட்டத்தின் (Taiwan Policy Act) மூலம் தங்கள் இரு கட்சி பிரச்சாரத்தை தீவிரப்படுத்துகின்றன. இந்தச் சட்டம், 'மூலோபாய தெளிவற்ற தன்மை' என்ற பாசாங்குக்கு முற்றுப்புள்ளி வைப்பதோடு, சீனாவிற்கு எதிரான தைவானின் போரில் அமெரிக்காவை இணைத்துக் கொள்ளும். தைவானுக்கு கிட்டத்தட்ட 4.5 பில்லியன் டாலர் இராணுவ உதவியை வழங்குவதுடன், இந்த மசோதா தைவானை ஒரு முக்கிய நேட்டோ அல்லாத நட்பு நாடாக அறிவிக்கும், ஒரு சீனா கொள்கையை திறம்பட முறியடித்து, சீனாவுடனான உறவுகளை சிதைத்து, அமெரிக்காவை போருக்கான பாதையில் வைக்கும்.

NBC இன் 'Meet the Press' இல் ஞாயிற்றுக்கிழமை போர்க்குணமிக்க கருத்துக்களில், ஜனநாயகக் கட்சியின் செனட்டர் கிறிஸ் வான் ஹோலன் அறிவித்தார்: 'தைவான் சீனாவிற்கு முடிந்தவரை கடினமாக இருக்க நாங்கள் உதவ வேண்டும், மேலும் தைவானுக்கு இராணுவ உதவியை வழங்குவதன் மூலம் நாங்கள் அதைச் செய்து வருகிறோம். தைவானை முள்ளம்பன்றியாக மாற்ற நாம் அதைத் தொடர்ந்து செய்ய வேண்டும், இதன் மூலம் சீனா தைவானைப் பார்க்கும்போது, இது ஒரு நரகச் சண்டையாக இருக்கும், வெல்லக்கூடிய சண்டையாக இருக்காது என்பதை அது உணர்ந்துகொள்ளும்”.

வான் ஹோலனும் மற்றவர்களும் அதை சீனாவைத் தடுக்கும் மூலோபாயமாக சித்தரிக்கின்றனர். உண்மையில், தைவானை சீனாவுக்கு எதிரான ஒரு அமெரிக்க செயல்பாட்டுத் தளமாக மாற்றுவதைத் தடுக்க, தைவானை பலவந்தமாக மீண்டும் ஒன்றிணைக்க பெய்ஜிங்கை தூண்டும் ஒரு மூலோபாயமாகும். வாஷிங்டனின் நோக்கமானது, ஒரு பரந்த அணுவாயுதப் பேரழிவின் ஆபத்தில் கூட அமெரிக்காவின் உலக மேலாதிக்கத்திற்கு முக்கிய அச்சுறுத்தலாகக் கருதும் நாட்டை பலவீனப்படுத்தி, சீர்குலைத்து, இறுதியில் துண்டு துண்டாக உடைக்கும் ஒரு நீட்டிக்கப்பட்ட பினாமிப் போராகும்.